ផលនៃកសិកម្មទៅលើសេដ្ឋកិច្ចរបស់ប្រទេសកម្ពុជា
ផលនៃកសិកម្មទៅលើសេដ្ឋកិច្ចរបស់ប្រទេសកម្ពុជា
គេដឹងច្បាស់ថា កសិកម្មមានផលយ៉ាងជ្រាលជ្រៅទៅលើកំណើនសេដ្ឋកិច្ចនៃប្រទេសកម្ពុជា។ នៅក្នុង Blog លើកមុន ខ្ញុំបានបញ្ជាក់ពីកសិកម្មដែលមាននិរន្តភាព និងទ្រាំទ្របាននឹងអាកាសធាតុ ថែមទាំងដើរតួនាទីមួយក្នុងការកាត់បន្ថយភាពក្រីក្រ ដោយប្រើកំលាំងមនុស្សចំនួនជាង ៥០% នៅក្នុងប្រទេសកម្ពុជា។ ក្នុងភាពជាផ្នែកតែមួយគត់នៃសេដ្ឋកិច្ច កសិកម្មមានចំណែកជាង ៣០% នៃផលិតផលសរុបក្នុងស្រុករបស់ប្រទេសកម្ពុជា។ ដោយសារមានក្របខ័ណ្ឌច្បាប់ដែលអនុគ្រោះសំរាប់ការធ្វើជំនួញ ហើយអត្រានៃកំណើនលូតលាស់ប្រចាំឆ្នាំគិតជាមធ្យមមាន ៧% ក្នុងមួយឆ្នាំ នៅក្នុងរយៈពេលមួយទសវត្សកន្លងទៅនេះ ប្រទេសកម្ពុជានឹងមានការរីកចំរើនបន្តទៀត នៅក្នុងផ្នែកកសិកម្ម និងវិស័យដែលមានការទាក់ទងនឹងកសិកម្ម។ ការនេះនឹងផ្តល់ឱកាសល្អៗជាច្រើនសំរាប់ការធ្វើពាណិជ្ជកម្ម និងការរកស៊ីជាមួយប្រទេសកម្ពុជា។
ស្រូវរបស់កម្ពុជាគឺជាគំរូមួយដ៏ល្អនៃតំលៃបន្ថែមទៅលើសេដ្ឋកិច្ចដែលមានជោគជ័យនៃមុខរបរកសិកម្ម និងកសិកររបស់ប្រទេសកម្ពុជា។ ស្រូវផ្កាម្លឹះរបស់កម្ពុជាត្រូវបានគេចាត់ទុកជាស្រូវល្អបំផុតនៅក្នុងពិភពលោក។ នេះជាជោគជ័យមួយគួរអោយកត់សំគាល់ដែលបញ្ជាក់ពីគុណភាពនៃផលិតផលកសិកម្មរបស់កម្ពុជា និងសក្តានុពលនៃកំណើននៃការនាំចេញស្រូវ។ វាថែមទាំងជាព័ត៌មានដ៏ល្អបំផុតមួយសំរាប់ការខិតខំជាបន្ត ក្នុងការលុបបំបាត់ភាពក្រីក្រខ្លាំងនៅកម្ពុជា។
ស្រូវផ្កាម្លឹះរបស់កម្ពុជាត្រូវបានគេទទួលស្គាល់នៅក្នុងពិភពលោកថាជាស្រូវល្អជាងគេបំផុត ក្នុងពិភពលោក នៅក្នុងរយៈពេល ៣ ឆ្នាំជាប់គ្នាមកនេះ។ ក្នុងឆ្នាំនេះ ស្ថានទូតអាមេរិកបានរៀបចំការប្រលងភ្លក់បាយ ដែលដាំពីអង្ករប្រភេទផ្សេងៗរបស់កម្ពុជា។
យ៉ាងណាក្តី ស្រូវអង្ករមិនមែនជាជោគជ័យតែមួយរបស់កម្ពុជាទេ។ អ្នកដាំស្វាយនៅកម្ពុជាអាចបេះបានពីរដងក្នុងមួយឆ្នាំ គឺនៅខែមិនា ឬមេសាម្តង និងម្តងទៀតនៅខែតុលាឬវិច្ឆិកា។ ការបេះបានពីរដងនេះ ដែលមិនដែលឃើញមាននៅកន្លែងដទៃជាច្រើនទៀត ធ្វើអោយកម្ពុជាមានប្រៀបក្នុងការផ្គត់ផ្គង់ផ្លែឈើឆ្ងាញ់ ប្រកបដោយគុណភាព ទាំងសំរាប់ផ្គត់ផ្គង់តំរូវការនៅក្នុងស្រុក ទាំងសំរាប់ទីផ្សានាំចេញដែលមានកំណើនកាន់តែធំ។ ប៉ុន្តែ ក្នុងពេលដែលឧស្សាហកម្មស្វាយ និងផ្នែកដទៃទៀតនៃវិស័យឧស្សាហកម្មរបស់កម្ពុជាបន្តរីកធំ មានរឿងខ្លះដែលចោទជាបញ្ហាប្រឈម នៅពេលអនាគត។ ឧទាហរណ៍ ការកសាងសមត្ថភាពដើម្បីជំរុញកំណើនផលិតភាព និងការប្រើបរិក្ខា និងបច្ចេកទេសកសិកម្មទំនើបរឹតតែផ្តល់ផលចំណេញច្រើនថែមទៀតដល់វិស័យកសិកម្មរបស់កម្ពុជា។
មិនដូចប្រទេសភាគច្រើនទេ គេឃើញមានស្វាយនៅគ្រប់ពេលនៅទូទាំងប្រទេសកម្ពុជា។ វាពិតជាតំណាងអោយគុណភាពដ៏ល្អនៃកសិកម្មផ្លែឈើហូបផ្លែរបស់ប្រទេសកម្ពុជា។
វាជាការល្អដែលប្រទេសកម្ពុជា ពេលនេះ មានដៃគូសំរាប់ជួយរកដំណោះស្រាយចំពោះបញ្ហាប្រឈមទាំងនេះ ហើយដែលបានជួយផ្ញើសារមួយយ៉ាងខ្លាំងទៅពិភពលោកថា កម្ពុជារីករាយនឹងចែករំលែកជោគជ័យជាបន្តនៃជំនួយផ្នែកកសិកម្ម។ ក្នុងពេលថ្មីៗនេះ លោក John Allen ប្រធាន និងជានាយកគ្រប់គ្រងទូទៅនៃក្រុមហ៊ុន John Deere និងអ្នកដឹកនាំក្រុមហ៊ុនដទៃទៀតបានមកធ្វើទស្សនកិច្ចនៅកម្ពុជា ដោយបង្ហាញអោយឃើញថា ក្រុមហ៊ុនអាមេរិកក៏ទទួលស្គាល់ផងដែរនូវសក្តានុពលរបស់ប្រទេសកម្ពុជា ចំពោះកំណើនលូតលាស់នៅពេលអនាគត ក្នុងផ្នែកកសិពាណិជ្ជកម្ម។ ក្នុងនាមជាក្រុមហ៊ុនដ៏ធំមួយផ្នែកកម្មន្តសាល លក់ និងនាំចេញគ្រឿងម៉ាស៊ីន និងបរិក្ខា កសិកម្មធុនធ្ងន់ប្រកបដោយគុណភាពខ្ពស់ ទស្សនកិច្ចរបស់ John Deree នៅកម្ពុជា ដែលក្នុងនោះ មានការទៅមើលទីកន្លែងរបស់ក្រុមហ៊ុន RMA ក្នុងរាជធានីភ្នំពេញ ហើយនិងការជួបជាមួយឯកឧត្តម ឧបនាយករដ្ឋមន្រ្តី សុខ អាន គឺជាសញ្ញាវិជ្ជមានមួយថា វិស័យកសិកម្មរបស់ប្រទេសកម្ពុជាត្រូវបានគេរំពឹងថា នឹងផ្តល់ផលចំណេញសំរាប់ពេលរាប់ឆ្នាំទៅមុខទៀត។ ទស្សនកិច្ចនេះគឺជានិមិត្តរូបមួយផងដែរនៃទំនាក់ទំនងរឹងមាំផ្នែកពាណិជ្ជកម្ម រវាងសហរដ្ឋអាមេរិក និងប្រទេសកម្ពុជា ដើម្បីគាំទ្រដល់ផលប្រយោជន៍ទៅវិញទៅមកផ្នែកសេដ្ឋកិច្ច។
លោកស្រីអនុប្រធានទូត Julie Chung ដើរមើលទីតាំងរបស់ក្រុមហ៊ុន RMA នៅរាជធានីភ្នំពេញ ជាមួយប្រធាន និងនាយកគ្រប់គ្រងទូទៅរបស់ John Deere គឺលោក John Allen ។
នៅខេត្តកំពង់ធំ កម្មវិធីរបស់ទីភ្នាក់ងារ USAID របស់សហរដ្ឋអាមេរិកបានជួយកសិករធ្វើស្រែចំនួន ៣៣២៣ នាក់ អោយបង្កើនទិន្នផលស្រូវរបស់គេអោយបានចំនួនសរុបរួមគ្នាចំនួន ២ ៥៥៧ តោន ដែលធ្វើអោយគេទទួលបានចំណូលបន្ថែមចំនួន ៦៥០ ០០០ ដុល្លាអាមេរិក។ (រូបថតដោយអង្គការ Fintrac Inc.)
សហរដ្ឋអាមេរិកនៅតែមានការប្តេជ្ញាចិត្តក្នុងការជួយដល់កំណើនលូតលាស់នៃសេដ្ឋកិច្ចរបស់ប្រទេសកម្ពុជាដដែល ដែលរួមមានជោគជ័យនៅក្នុងវិស័យកសិពាណិជ្ជកម្ម។ កម្មវិធីមួយចំនួនរបស់រដ្ឋាភិបាលសហរដ្ឋអាមេរិក ដែលផ្តល់ថវិកាអោយតាមរយៈទីភ្នាក់ងារ USAID របស់សហរដ្ឋអាមេរិក មើលឃើញបញ្ហាប្រឈមនៅក្នុងការជួយកសិកររាប់ពាន់នាក់អោយបង្កើនចំណូលរបស់គេ ហើយបំពេញតំរូវការដែលចេះតែមានច្រើនឡើង លើផលិតផលរបស់គេ។ តាមរយៈគំរោងកម្មវិធីរបស់ប្រធានាធិបតីសហរដ្ឋអាមេរិក ដែលមានឈ្មោះថា Feed the Future (ចិញ្ចឹមអនាគត) កម្មវិធីរបស់ទីភ្នាក់ងារ USAID ធ្វើការឆ្លើយតបដោយផ្តល់ពូជស្រូវថ្មីៗ ហើយជួយកសិករខ្មែរនៅក្នុងការបង្កើនប្រភពចំណូល ដោយការដាំដំណាំផ្សេងៗ និងការយល់ដឹងពីវិធីដាំដុះដោយឆ្លាស់គ្នាតាមរដូវ។ តាមរយៈបច្ចេកទេសថ្មីៗ និងវិធីធ្វើកសិកម្មដែលប្រសើរជាងមុន គ្រាន់តែកម្មវិធីដែលមានឈ្មោះថា HARVEST របស់ទីភ្នាក់ងារ USAID បានបង្កើនទិន្នផល និងចំណូលសំរាប់គ្រួសារកសិករធ្វើស្រែចំនួន ៤៤ ៤៥០ គ្រួសារ ដែលជាការរួមចំណែកថែមទៀតដល់ជោគជ័យនៃការធ្វើស្រែនៅកម្ពុជា ដែលផលិតផលរបស់ខ្លួនបានជាប់លេខ១។
កម្មវិធី HARVEST ថែមទាំងបានជួយកសិករខ្មែរដែលធ្វើសាកវប្បកម្ម ចំនួន ៣១៤ គ្រួសារអោយបង្កើនទិន្នផលរបស់គេបាន ២៦០% តាមរយៈបច្ចេកទេសថ្មីៗ និងការធ្វើកសិកម្ម ដែលល្អជាងមុន។
ខ្ញុំមានជំនឿយ៉ាងមុតមាំថា ការខិតខំរួមគ្នារបស់សហរដ្ឋអាមេរិក រដ្ឋាភិបាលកម្ពុជា សង្គមស៊ីវិល និងវិស័យឯកជន ហើយសំខាន់បំផុត កសិករកម្ពុជា នឹងបន្តកំណត់វិស័យកសិកម្ម ហើយនាំដល់គំរូធុរកិច្ចប្រកបដោយនិរន្តភាព ដែលផ្តល់ផលចំណេញដល់ប្រជាជនកម្ពុជា រាប់ឆ្នាំទៅមុខ។ តើលោកអ្នកគិតថា អ្វីខ្លះដែលគេអាចធ្វើបាន ក្នុងការជំរុញបន្ថែមដល់កសិកម្ម និងកំណើនសេដ្ឋកិច្ចរបស់ប្រទេសកម្ពុជា?
Comments
Post a Comment